राष्ट्रीय गणित दिनी सावलीत ज्ञानयज्ञ : सलग 7 तास गणित अध्यापनाने विद्यार्थ्यांच्या मनातील भीती नाहीशी.
एस.के.24 तास
सावली : राष्ट्रीय गणित दिनाच्या पावन निमित्ताने सावली करिअर पॉईंट येथे गणितप्रेमी विद्यार्थ्यांसाठी एक अविस्मरणीय शैक्षणिक उपक्रम पार पडला. या उपक्रमाची सुरुवात प्रा. नौशाद खान पठाण सर यांच्या प्रेरणादायी मार्गदर्शनाने झाली. त्यांनी आपल्या मनोगतातून महान गणितज्ञ श्रीनिवास रामानुजन यांच्या जीवनकार्याचा गौरव करत, गणित हे भीतीचे नव्हे तर आत्मविश्वासाचे साधन आहे, असा मौलिक संदेश विद्यार्थ्यांना दिला.
रामानुजन यांनी अत्यंत प्रतिकूल परिस्थितीतही गणिताच्या क्षेत्रात जागतिक ओळख निर्माण केली, हे उदाहरण देत विद्यार्थ्यांनी अपयश, भीती व न्यूनगंड बाजूला ठेवून गणिताशी मैत्री करावी, असे आवाहन प्रा. पठाण सरांनी केले. त्यांच्या या भावस्पर्शी भाषणामुळे उपस्थित विद्यार्थ्यांमध्ये नवचैतन्य निर्माण झाले.
यानंतर प्रा. विवेक खरवडे यांनी स्पर्धा परीक्षेच्या दृष्टीने अत्यंत महत्त्वपूर्ण असलेले गणित सलग 7 तास प्रभावी पद्धतीने शिकवले. गणित कठीण वाटण्यामागील मानसिक अडथळे दूर करून, संकल्पना सोप्या भाषेत, दैनंदिन उदाहरणांद्वारे आणि परीक्षाभिमुख तंत्राने समजावून सांगितल्या.या दीर्घ गणित सत्रादरम्यान विद्यार्थ्यांच्या चेहऱ्यावर भीतीऐवजी आत्मविश्वास आणि उत्साह स्पष्टपणे दिसून आला. “गणित अवघड नाही, शिकवण्याची पद्धत अवघड असते” हेच जणू या उपक्रमातून सिद्ध झाले. अनेक विद्यार्थ्यांनी आज पहिल्यांदाच गणित समजल्याची भावना व्यक्त केली.
या उपक्रमाला विविध स्पर्धा परीक्षांची तयारी करणाऱ्या विद्यार्थ्यांचा उत्स्फूर्त प्रतिसाद मिळाला. पालक, विद्यार्थी आणि उपस्थित मान्यवरांनी सावली करिअर पॉईंट व प्रा. विवेक खरवडे यांच्या या शैक्षणिक कार्याचे मनापासून कौतुक केले.राष्ट्रीय गणित दिनाच्या निमित्ताने झालेला हा उपक्रम केवळ एक क्लास न राहता, विद्यार्थ्यांच्या आयुष्यात गणिताबद्दल सकारात्मक दृष्टिकोन निर्माण करणारा प्रेरणादायी ज्ञानयज्ञ ठरला, असे मत उपस्थितांनी व्यक्त केले.
