उभ्या पिकअप वाहनाला ट्रकची धडक भीषण अपघातात सावली तालुक्यातील 3 महिला शेतमजूराचा मृत्यू ; 14 शेतमजूर जखमी.
एस.के.24 तास
सावली : सावली व मूल तालुक्यातील जवळपास 20 मजूर काल रात्री दहाच्या सुमारास पिकअप वाहनाने तेलंगणा राज्याकडे रवाना झाले होते. पहाटे सुमारे 3:00. वाजताच्या सुमारास मंचुरियलजवळ मजुरांनी लघुशंकेसाठी पिकअप रस्त्याच्या कडेला थांबवली.
मजूर खाली उतरत असतानाच मागून येणाऱ्या भरधाव हायवा ट्रकचा चालक वाहनावरील नियंत्रण गमावून थेट पिकअपवर आदळला.या भीषण धडकेत मूल तालुक्यातील चांदली बुज येथील मीनाबाई अनिल लाटेलवार वय,50 वर्ष यांचा जागीच मृत्यू झाला.
तर उपचारादरम्यान विमलबाई सोयाम वय,55 वर्ष रा. बेबाळ) व लीलाबाई मंडरे वय,45 वर्ष रा.दिघोरी या दोन महिलांचा मृत्यू झाला.अपघातात विकास टेकाम याच्या पायाला गंभीर दुखापत झाली असून काही मजुरांची अवस्था चिंताजनक आहे.
जखमी मजुरांना तात्काळ दवाखान्यात दाखल करण्यात आले असून काहींना पुढील उपचारासाठी चंद्रपूरला रेफर करण्यात आले आहे. तर काही मजूर तेलंगणा राज्यातच उपचार घेत आहेत.
घटनेची माहिती मिळताच परिसरात शोककळा पसरली असून परराज्यात मजुरीसाठी जाणे किती धोकादायक ठरते, हे या घटनेतून पुन्हा एकदा स्पष्ट झाले आहे.वृत्त लिहेपर्यंत मृत मजुरांचे मृतदेह पोस्टमार्टमसाठी तेलंगणा राज्यातच ठेवण्यात आले असल्याची माहिती मिळाली आहे. एका अपघाताने तीन कुटुंबांचा आधार हिरावून घेतल्याने गावागावांत हळहळ व्यक्त केली जात आहे.
