ताडगाव जंगल परिसरात घातपात घडवून आणण्याच्या उद्देशाने रेकी करणाया जहाल माओवाद्यास गडचिरोली पोलीस दलाने केली अटक.
एस.के.24 तास
भामरागड : गडचिरोली जिल्हा हा माओवादग्रस्त जिल्हा म्हणून ओळखला जातो. येथे माओवादी सरकारी मालमत्तेचे नुकसान करणे, सुरक्षा दलाच्या जवानांवर हल्ला करणे व इतर प्रकारच्या सरकारी कामात अडथळे आणून जाळपोळ करणे इ. देशविघातक कृत्य करत असतात. सुरक्षा दलांविरुद्धच्या अनेक हिंसक कारवायांमध्ये सक्रिय सहभाग असलेल्या एका जहाल माओवाद्यास काल दिनांक 13/09/2025 रोजी गडचिरोली पोलीस दलाने ताब्यात घेवून त्याला अटक केली आहे.
गडचिरोली पोलीस दलाच्या प्रभावी माओवाद विरोधी कारवाईमुळे जानेवारी 2022 ते आतापर्यंत एकूण 109 माओवाद्यांना अटक करण्यात गडचिरोली पोलीस दलास यश आले आहे.सविस्तर वृत्त असे आहे की, काल दि. 13/09/2025 रोजी उपविभाग भामरागड अंतर्गत पोस्टे ताडगाव हद्दीतील मौजा तिरकामेटा जंगल परिसरामध्ये विशेष अभियान पथकाची दोन पथके माओवादविरोधी अभियान राबवित असताना सदर जंगल परिसरात त्यांना एक संशयित व्यक्ती फिरत असताना आढळून आल्याने पथकाच्या जवानांनी त्याला ताब्यात घेतले होते.
त्यानंतर त्याची अधिक सखोल चौकशी करण्यासाठी पोलीस उप-मुख्यालय प्राणहिता येथे आणले असता, सदर इसमाचे नाव 1) शंकर भिमा महाका (सदस्य, भामरागड दलम), वय 32 वर्ष रा.परायनार,त.भामरागड, जि.गडचिरोली असल्याचे उघड झाले.
अधिक चौकशी दरम्यान समोर आले आहे की, सदर इसम हा पोलीसांच्या अभिलेखावरील जहाल माओवादी असून घातपात घडवून आणण्याच्या उद्देशाने तो तिरकामेटा जंगल परिसरात रेकी करण्यासाठी दाखल झाला होता. जहाल माओवादी शंकर भिमा महाका (सदस्य, भामरागड दलम), वय 32 वर्षे, रा. परायनार तह.भामरागड, जि.गडचिरोली
दिनांक 21 जानेवारी 2022 रोजी पोस्टे धोडराज हद्दीत धोडराज ते इरपनार मार्गे पेनगुंडा रत्स्याच्या कामावर असलेल्या एकूण 2 कोटी रुपये किंमतीच्या 19 वाहनांची माओवाद्यांनी जाळपोळ केल्याच्या घटनेवरून उपपोस्टे लाहेरी येथे दाखल अप क्र. 01/2022 अन्वये काल दिनांक 13/09/2025 रोजी अटक करण्यात आली आहे.
त्याच्यावर 01 जाळपोळ, 01 खून व इतर-02 असे एकूण 04 गुन्हे दाखल आहेत.
दलममधील कार्यकाळ
1) सन 2016 पासून सन 2021-22 पर्यंत माओवादी संघटनेमध्ये जनमिलीशीया पदावर काम केले.
2) सन 2021 - 22 साली भामरागड दलम मध्ये सदस्य पदावर भरती झाला.
3) सन-2022 पासून आजपावेतो परायनार व आसपासच्या जंगल परिसरात राहून दलमकरीता पोलीसांची माहिती मिळविण्याचे काम करीत होता. तसेच वेळोवेळी गरज पडल्यास दलमसोबत राहून विध्वंसक कारवायांमध्ये सहभागी होत होता.
कार्यकाळात केलेले गुन्हे
जाळपोळ - 01
1) सन 2022 मध्ये मौजा धोडराज ते ईरपनार मार्गे पेनगुंडा रस्त्यावर माओवाद्यांनी रस्त्याच्या कामावरील वाहनांची जाळपोळ केल्याच्या घटनेत त्याचा सहभाग होता.
खून - 01
1) सन-2023 मध्ये मौजा पेनगुंडा येथील एका निरपराध इसमाच्या खूनात त्याचा प्रत्यक्ष सहभाग होता.
इतर - 02
शासनाने जाहिर केलेले बक्षीस.
1) महाराष्ट्र शासनाने शंकर भिमा महाका (सदस्य, भामरागड दलम) याच्यावर 02 लाख रूपयांचे बक्षीस जाहिर केले होते.
सदरची कारवाई विशेष पोलीस महानिरीक्षक (नक्षलविरोधी अभियान) श्री. संदिप पाटील, पोलीस उप-महानिरीक्षक गडचिरोली परिक्षेत्र श्री. अंकित गोयल, पोलीस अधीक्षक गडचिरोली श्री. नीलोत्पल, अपर पोलीस अधीक्षक (अभियान) श्री. एम. रमेश, अपर पोलीस अधीक्षक अहेरी (प्राणहिता) श्री. सत्य साई कार्तिक, पोलीस उप-अधीक्षक (अभियान) श्री. विशाल नागरगोजे व
प्रभारी उपविभागीय पोलीस अधिकारी भामरागड श्री.अजय कोकाटे, यांचे मार्गदर्शनाखाली विशेष अभियान पथकाचे अधिकारी व जवान यांनी पार पाडली. यावेळी पोलीस अधीक्षक श्री. नीलोत्पल यांनी सदर जंगल परिसरात माओवादविरोधी अभियान आणखी तीव्र करण्याचे संकेत दिले असून, पुन्हा एकदा माओवाद्यांना माओवादाची हिंसक वाट सोडून आत्मसमर्पण करुन सन्मानाने जीवन जगण्याचे आवाहन केले आहे.
