महात्मा फुले स्मृतिदिनानिमित्त आंबेडकर महाविद्यालयात कार्यक्रम.
अमरदीप लोखंडे - सहसंपादक
ब्रम्हपुरी : क्रांतीसूर्य महात्मा ज्योतिबा फुले यांच्या स्मृतिदिनानिमित्त डॉ.बाबासाहेब आंबेडकर कला,वाणिज्य व विज्ञान महाविद्यालय, ब्रह्मपुरी येथे दिनांक २८ नोव्हेंबर रोजी मार्गदर्शनपर कार्यक्रमाचे आयोजन करण्यात आले. महाविद्यालयाचे प्राचार्य डॉ. देवेश कांबळे यांच्या मार्गदर्शनाखाली झालेल्या या कार्यक्रमाचे अध्यक्षस्थान मराठी विभागप्रमुख प्रा.डॉ.जगदीश्वर मेश्राम यांनी भूषविले होते. कनिष्ठ महाविद्यालयातील इंग्रजी विभागप्रमुख प्रा.मनोज चांभारे याची विशेष उपस्थिती लाभली होती. प्रा. वसुधा देवगडे प्रमुख मार्गदर्शक म्हणून विचारमंचावर उपस्थित होत्या.
या प्रसंगी आपल्या अध्यक्षीय भाषणात प्रा. डॉ. मेश्राम यांनी महात्मा ज्योतिबा फुले यांनी समाजजागृतीसाठी केलेल्या अथक प्रयत्नांबद्दल आणि त्यांनी सहन केलेल्या संघर्षांबद्दल सविस्तर भाष्य केले.प्रमुख मार्गदर्शिका प्रा.वसुधा देवगडे यांनी महात्मा ज्योतिबा फुले हे खरे अर्थाने युगपुरुष असून त्यांनी समाज, साहित्य,शिक्षण, स्थापत्य अशा विविध क्षेत्रात केलेल्या कार्याचे विस्तृत विवेचन केले.
कार्यक्रमाचे संचालन सांस्कृतिक विभाग प्रमुख प्रा. तुफान अवताडे यांनी तर आभार प्रा. तोषित मोटघरे यांनी मानले.कार्यक्रमाला महाविद्यालयातील प्राध्यापकवृंद, शिक्षकेतर कर्मचारी तसेच विद्यार्थी मोठ्या संख्येने उपस्थित होते.
