भंडाऱ्यात एका महिला भाजप उमेदवाराने छत्रपती शिवाजी महाराजांच्या पुतळ्याच्या गळ्यात पक्षाची टोपी आणि भाजपचा दुपट्टा घालून महाराजांचा अवमान.
📍शिवभक्तांच्या भावना दुखावल्या असून भाजप उमेदवाराच्या या कृतीचा तीव्र निषेध व्यक्त संतप्त प्रतिक्रिया समाज माध्यमांवर उमटत आहेत.
एस.के.24 तास
भंडारा : छत्रपती शिवाजी महाराज’ हे नाव महाराष्ट्रासाठी कायमच अत्यंत भावनिक मुद्दा राहिला आहे. महाराष्ट्राच्या राजकारणात आतापर्यंत इतिहासातील विविध व्यक्ती, घटना, प्रसंगांचा आधार प्रचारासाठी घेण्यात आल्याचं दिसून येतं. सध्या नगरपालिका निवडणुकीच्या पार्श्वभूमीवर प्रचारात छत्रपती शिवाजी महाराजांच्या नावाचा वापर केला जात आहे.
भंडाऱ्यात एक अत्यंत संतापजनक आणि निंदनीय प्रकार समोर आला आहे. एका महिला भाजप उमेदवाराने छत्रपती शिवाजी महाराजांच्या पुतळ्याच्या गळ्यात भाजपचा दुपट्टा घालून आणि त्यांना त्यांच्या जिरेटोपवर भाजपची टोपी घालून महाराजांचा अवमान केल्याची संतप्त प्रतिक्रिया समाज माध्यमांवर उमटत आहे. या प्रकारामुळे शिवभक्तांच्या भावना दुखावल्या असून भाजप उमेदवाराच्या या कृतीचा काँग्रेसने तीव्र निषेध व्यक्त केला आहे.
महाराष्ट्राच्या अनेक निवडणुका, मग त्या विधानसभा असो लोकसभा निवडणुका असो वा नगरपालिका निवडणूक असो छत्रपती शिवाजी महाराजांच्या मुद्द्यावरही लढल्या गेल्यात. गेल्या दीड-दोन दशकात हे प्रमाण तर अधिक वाढल्याचं प्रकर्षानं दिसून येतं. महाराजांच्या नावावर निवडणुका लढविणे आणि जिंकणे इथपर्यंत ठीक आहे मात्र आता महाराजांचा अपमान करण्यापर्यंत पक्षांची मजल पोहोचली आहे. असाच एक प्रकार भंडारा येथून समोर येत आहे.
नगरपालिका निवडणुकीची प्रचार अंतिम टप्प्यात पोहोचला असून नगराध्यक्ष आणि नगरसेवक पदाचे उमेदवार प्रत्येक प्रभाग पिंजून काढत आहेत. दरम्यान भंडारा शहरातील शुक्रवारी परिसरात छत्रपती शिवाजी महाराजांचा पुतळा आहे. प्रभाग दोन मधील महिला भाजप उमेदवार प्रचारादरम्यान महाराजांच्या पुतळ्याला वंदन करण्यासाठी आल्या.
महाराजांना वंदन करत असतानाच त्यांनी छत्रपती शिवरायांच्या गळ्यात भाजप पक्षाचा दुपट्टा घातला एवढेच नव्हे तर महाराजांच्या जिरेटोपवर भाजपाची टोपी घालण्यापर्यंत या महिला उमेदवारांची मजल गेली. या दोन्ही भाजप महिला उमेदवारांच्या या कृतीने शिवभक्तांच्या भावना दुखावल्याची प्रतिक्रिया आता समाज माध्यमांवर व्यक्त केली जात आहे.
भाजप महिला उमेदवारांच्या या कृतीवर काँग्रेसने कडाडून टीका केली आहे. भाजप पक्षाकडून वारंवार छत्रपती शिवाजी महाराजांचा अवमान होत असते. माजी राज्यपाल यांनी देखील महाराजांबद्दल वादग्रस्त वक्तव्य केले होते. एका कार्यक्रमात पंतप्रधान मोदी यांनी चक्क महाराजांचा जिरेटोप घालून महाराजांचा अवमान केला होता. भाजप कडून वारंवार अशा पद्धतीचे कृत्य होत असते.
अशा उन्मादी प्रवृत्तीवर कोणतीही कारवाई होत नसल्यामुळे यांची हिम्मत वाढली असून वारंवार छत्रपती शिवरायांचा अपमान करण्याची यांची प्रवृत्ती वाढतच चालली असल्याची संतप्त प्रतिक्रिया काँग्रेसचे जिल्हाध्यक्ष मोहन पंचभाई यांनी केली आहे.या महिला उमेदवारांची कृती ही अक्षम्य असूनही त्यांनी त्वरित महाराजांच्या डोळ्यासमोर माथाडीतून माफी मागावी अशी मागणी शिवप्रेमींकडून केली जात आहे.
या प्रकारामुळे शिवभक्तांच्या भावना दुखावल्या आहेत.तर दुसरीकडे आचार संहिता भंग झाल्याचं सुद्धा बोलले जात आहे. या कृत्यामुळे निवडणुकीच्या पार्श्वभूमीवर राजकीय वाद पेटण्याची शक्यता वर्तवली जात असून ओबीसी क्रांती मोर्चाचे संस्थापक अध्यक्ष संजय मते यांनी तीव्र विरोध केला आहे.
या सर्व प्रकारावर निवडणूक विभागाच्या अधिकाऱ्यांनी विशेष लक्ष घालून योग्य ती कारवाई करावी अशी मागणी सुद्धा ओबीसी क्रांती मोर्चाच्या वतीने करण्यात आली आहे.
