गडचिरोली पोलीस आणि सिआरपीएफ यांच्या माओवाद्यांसोबत झालेल्या चकमकीत 2 जहाल महिला माओवाद्यांना कंठस्नान घालण्यात पोलीस दलास यश.
📍घटनास्थळावरुन 01 AK - 47 रायफल व 01 पिस्तूल अशा 02 अग्निशस्त्रांसह दारुगोळा साहित्य जप्त.
एस.के.24 तास
एटापल्ली : (दि.17/09/2025 बुधवार) एटापल्ली तालुक्यातील पोस्टे गट्टा (जां.) हद्दीतील मौजा मोडस्के जंगल परिसरात विध्वंसक कारवाया करुन घातपात घडवून आणण्याच्या उद्देशाने गडचिरोली विभागातील गट्टा दलमचे काही माओवादी एकत्र येऊन दबा धरुन बसले आहेत.अशा गोपनीय सुत्रांकडून मिळालेल्या विश्वसनीय माहितीवरुन मा.वरिष्ठांच्या मार्गदर्शनाखाली
अपर पोलीस अधीक्षक,अहेरी श्री.सत्य साई कार्तिक यांच्या नेतृत्वात गडचिरोली पोलीस दलातील विशेष अभियान पथकाच्या पाच तुकड्या आज दिनांक 17/09/2025 रोजी अहेरी येथून तातडीने सदर जंगल परिसरात माओवादविरोधी अभियान राबविणेकामी रवाना करण्यात आल्या होत्या. अभियानादरम्यान पोस्टे गट्टा (जां.) चे पोलीस पथक व सीआरपीएफ 191 बटा. ई कंपनीच्या पथकाकडून जंगलाच्या बाहेरुन सदर जंगल परिसरात घेराबंदी करण्यात आलेली होती.
यावेळी मौजा मोडस्के जंगल परिसरात पोलीस पथके माओवादविरोधी अभियान राबवित असताना जंगलात दबा धरून बसलेल्या माओवाद्यांनी जवानांना जीवे ठार मारण्याच्या व हत्यार लुटण्याच्या उद्देशाने जवानांच्या दिशेने अंदाधुंद गोळीबार सुरु केला.त्यावेळी पोलीसांनी माओवाद्यांना त्यांच्या हातातील शस्त्र खाली ठेऊन शरण येणे बाबत आवाहन केले.
माओवाद्यांनी शरण न येता पोलीसांवर आणखी जोरदार हल्ला चढवला. त्यावेळी जवानांनी प्रत्युत्तरादाखल व स्वसंरक्षणासाठी माओवाद्यांच्या दिशेने गोळीबार केला. पोलीसांचा वाढता दबाव पाहून माओवाद्यांनी घनदाट जंगलाचा फायदा घेत घटनास्थळावरून पळ काढला.
चकमकीनंतर सदर जंगल परिसरात जवानांनी शोध अभियान राबविले असता, घटनास्थळावर 02 जहाल महिला माओवाद्यांचे मृतदेह आढळून आले. सदर दोन्ही मृतक महिला माओवाद्यांची ओळख पटली असून ती खालीलप्रमाणे आहे,
1) सुमित्रा ऊर्फ सुनिता वेलादी, वय 38 वर्ष,रा. मडवेली ता.अहेरी, जि. गडचिरोली
गट्टा दलम कमांडर
बक्षिस - 08 लाख रु.
चकमक – 14
खून – 12
जाळपोळ – 03
इतर – 02
एकुण – 31
2) ललीता ऊर्फ लड्डो ऊर्फ संध्या कोरसा,
वय 34 वर्षे,
रा. नेलटोला,ता.पाखांजूर, जि.कांकेर (छ.ग.)
गट्टा दलम एसीएम
बक्षिस - 06 लाख रु.
चकमक – 08
खून – 04
जाळपोळ – 01
इतर – 01
एकुण – 14
• जप्त अग्निशस्त्रे व साहित्य
1) BEäò - 47 रायफल – 01
2) पिस्तूल - 01
3) जिवंत काडतूस - 37
4) वॉकी टॉकी - 02
वरील मृतक माओवाद्यांवर चकमक, जाळपोळ व खुन इ. वेगवेगळे गुन्हे दाखल आहेत. यासोबतच सदर घटनास्थळावरुन 01 एके-47 रायफल, 01 अत्याधुनिक पिस्तूल असे एकूण 02 अग्निशस्त्र, जिवंत काडतूस, माओवादी साहित्य व इतर दैनंदिन वापराचे साहित्य हस्तगत करण्यात गडचिरोली पोलीस दलास यश आले आहे.
तसेच मृत महिला माओवाद्यांपैकी ललीता ऊर्फ लड्डो ऊर्फ संध्या कोरसा, वय 34 वर्षे, रा. नेलटोला, ता. पाखांजूर, जि. कांकेर (छ.ग.) ही गट्टा दलम डिव्हीसीएम राजु वेलादी ऊर्फ कलमसाय याची पत्नी होती.
सदरचे माओवादविरोधी अभियान अपर पोलीस महासंचालक (विशेष कृती) डॉ. श्री. छेरिंग दोरजे, विशेष पोलीस महानिरीक्षक (नक्षलविरोधी अभियान) नागपूर श्री. संदिप पाटील, पोलीस उप-महानिरीक्षक गडचिरोली परिक्षेत्र श्री. अंकित गोयल, पोलीस उप-महानिरीक्षक (अभियान) सिआरपीएफ श्री. अजय कुमार शर्मा, पोलीस अधीक्षक, गडचिरोली श्री. नीलोत्पल, कमांडंट 191 बटा. सिआरपीएफ श्री. सत्य प्रकाश यांच्या मार्गदर्शनाखाली अपर पोलीस अधीक्षक,
अहेरी श्री. सत्य साई कार्तिक यांच्या नेतृत्वात सी-60, पोस्टे गट्टा (जां.) आणि सिआरपीएफच्या जवानांनी यशस्वीपणे पार पाडले. सन 2021 पासून गेल्या आजपावेतो गडचिरोली पोलीसांच्या सातत्यपूर्ण प्रयत्नांमुळे 93 कट्टर माओवाद्यांना कंठस्नान घालण्यात आले असून, 130 माओवाद्यांना अटक करण्यात आले आहे व 75 माओवाद्यांनी गडचिरोली पोलीसांसमोर आत्मसमर्पण केले आहे.
सदर खडतर अभियानादरम्यान सी-60 व सिआरपीएफच्या जवानांनी दाखविलेल्या या शौर्यपुर्ण कामगिरीचे पोलीस अधीक्षक श्री. नीलोत्पल यांनी कौतुक केले आहे. सदर अभियानाच्या यशस्वी अंमलबजावणीसाठी आणि सर्व जवानांना सुखरूप परत आणण्यासाठी संपूर्ण अभियानाची देखरेख करुन अपर पोलीस अधीक्षक (अभियान) श्री. एम. रमेश, अपर पोलीस अधीक्षक (प्रशासन) गडचिरोली श्री. गोकुल राज जी., पोलीस उप-अधीक्षक (अभियान)
श्री.विशाल नागरगोजे, सी-60 प्राणहिताचे प्रभारी अधिकारी सपोनि. राहुल देवडे यांच्यासह सी-60 गडचिरोली आणि प्राणहिताचे इतर अधिकारी व अंमलदार यांनी महत्त्वाची भूमिका बजावली आहे. तसेच पोलीस अधीक्षक श्री. नीलोत्पल यांनी सदर भागात माओवादविरोधी अभियान आणखी तीव्र करण्याचे संकेत दिले असून पून्हा एकदा सर्व माओवाद्यांना हत्यार ठेवून आत्मसमर्पण करुन मुख्य धारेमध्ये प्रवेश करण्यासाठी आवाहन केले आहे.
