वनपरिक्षेत्रातील चिचपल्ली रेंज मधील मंदातुकूम गावातील वाघाच्या हल्ल्यात गुराखी ठार.
एस.के.24 तास
चंद्रपूर : मानव वन्यजीव संघर्ष टोकाला पोहोचलेल्या चंद्रपूर जिल्ह्यात शनिवार 29 नोव्हेंबरला संध्याकाळी चिचपल्ली क्षेत्रात जनावरे चारण्यासाठी गेलेल्या गुराख्यावर वाघाने हल्ला केला. गुराख्याचा मृत्यू झाला.रमेश नागो बोमनवार वय,55 वर्ष असे मृत गुराख्याचे नाव आहे.या वर्षातील वन्यप्राण्यांच्या हल्ल्याची ही 41 वी घटना आहे.
वनपरिक्षेत्रातील चिचपल्ली रेंज कंपार्टमेंट क्रमांक.696 मध्ये मंदातुकूम गावातील रहिवासी रमेश नागो बोमनवार हे नेहमीप्रमाणे गुरे चारण्यासाठी जंगलात गेले होते. मात्र त्याठिकाणी दबा धरून बसलेल्या वाघाने बोमनवार यांच्यावर हल्ला करीत ठार केले.या घटनेची माहिती वनविभागाला मिळाल्यावर त्यांनी तात्काळ घटनस्थळ गाठत पंचनामा केला.नियमानुसार मृत गुराख्याच्या कुटुंबाला वनविभागातर्फे आर्थिक मदत देण्याची कारवाई सुरु करण्यात आली आहे.
विभागीय वनाधिकारी राजन तलमले यांनी परिसरातील नागरिकांना आवाहन केले आहे की,वन्यप्राण्यांच्या हालचाली लक्षात घेऊन अशा संवेदनशील वनक्षेत्रात एकटे फिरणे टाळावे आणि सतर्कता बाळगावी. वन्यप्राण्यांबद्दल कोणतीही माहिती असल्यास त्वरित वन विभागाला कळवावी.दरम्यान यावर्षी आतापर्यंत 41 जणांचा मानव वन्यजीव संघर्ष यामध्ये बळी गेला आहे.वाघाच्या हल्ल्यात 37,बिबटच्या हल्ल्यात 2,हत्ती व अस्वलाच्या हल्ल्यात प्रत्येकी एकाचा मृत्यू झाला आहे.
