मुल येथील किराणा मालाने भरलेली पिकअप चोरी २२.७१ लाखांचा मुद्देमाल जप्त.
मध्यप्रदेशातील छिंदवाडा जिल्ह्यातून तीन आरोपी अटकेत.
एस.के.24 तास
मुल : मुल शहरात किराणा व्यवसायिकाची किराणा मालाने भरलेली पिकअप वाहन चोरीस गेल्याची घटना उघडकीस आली होती.मुल पोलीस स्टेशनच्या डी.बी.पथकाने अवघ्या पाच दिवसांत तांत्रिक तपासाच्या माध्यमातून सदर गुन्हा उघडकीस आणत मध्यप्रदेशातील तीन आरोपींना अटक करून सुमारे २२ लाख ७१ हजार ५२२ रुपयांचा मुद्देमाल जप्त करण्यात यश मिळवले आहे.
९ जानेवारी २०२६ रोजी रात्री ८.३० वाजताच्या सुमारास फिर्यादी सुरेश नरसिंगदास सारडा यांचे चालक रंजीत केशव बोबाटे रा.चिचाळा ता. मुल यांनी फिर्यादीच्या सांगण्यावरून महिंद्रा बोलेरो पिकअप वाहन क्रं एमएच.३४ बी झेड ४४११ मध्ये स्नेहा कंपनीचे खाद्यतेल बॉक्स व इतर किराणा साहित्य भरले होते.सदर माल दुसऱ्या दिवशी सकाळी दुकानदारांना वितरीत करायचा असल्याने चार्मोर्शी रोडवरील श्रीकृष्ण राईस मिलच्या बंद परिसरात वाहन नेहमीप्रमाणे उभे करून चालक घरी गेले.
१० जानेवारी २०२६ रोजी सकाळी ८ वाजता श्रीकृष्ण राईस मिल येथे पाहणी केली असता उभी केलेली पिकअप वाहन आढळून आली नाही. यामध्ये पिकअप वाहन किंमत अंदाजे १० लाख रुपये, २०० नग स्नेहा खाद्यतेल बॉक्स किंमत ३ लाख ३० हजार ७६ रुपये व इतर किराणा साहित्य किमत ५० हजार ५६३ रुपये असा एकूण १३ लाख ८० हजार ६३९ रुपयांचा मुद्देमाल अज्ञात चोरट्यांनी चोरी केल्याची तक्रार पोलीस ठाणे मुल येथे दाखल करण्यात आली. त्यावरून गुन्हा नोंदविला होता.
सदर गुन्ह्याचा तपास मुल पोलीसांनी पोलीस स्टेशन सायबर, चंद्रपूर यांच्या सहकार्याने तांत्रिक पद्धतीने तपास करत मध्यप्रदेशातील छिंदवाडा जिल्ह्यातून आरोपीअनुज बबलू सोनी (२२), विनय कृपाल परतेती (२३) रा. भाम्बाडा, ता. उमरेठ, अंकित मुख धुर्वे (२२) रा. राजगाव, ता. मुखेड यांना ताब्यात घेऊन अटक करण्यात आली.
आरोपींकडून चोरी केलेले १५० नग स्नेहा खाद्यतेल बॉक्स किंमत २ लाख ४१ हजार २६ रुपये, इतर किराणा साहित्य किंमत ३० हजार ४९६ रुपये,चोरीस गेलेले पिकअप वाहन तसेच गुन्ह्यात वापरलेले पिकअप वाहन क्रं एम एच ४९ बी झेड ०२३६ किंमत १० लाख रुपये असा एकूण २२ लाख ७१ हजार ५२२ रुपयांचा मुद्देमाल जप्त करण्यात आला आहे.आरोपींना मुल येथील न्यायालयात हजर केले असता तीन दिवसांची पोलीस कोठडी मंजूर करण्यात आली.
सदर कारवाई पोलीस अधीक्षक मुम्मका सुदर्शन,अपर पोलीस अधीक्षक ईश्वर कातकडे, उपविभागीय पोलीस अधिकारी सत्यजित आमले यांच्या मार्गदर्शनाखाली पोलीस निरीक्षक विजय राठोड यांचा नेतृत्वात डी.बी. पथकाचे सहायक पोलीस निरीक्षक सुबोध वंजारी, पोहवा भोजराज मुंडरे
नापोअं चिमाजी देवकते, पोअं नरेश कोडापे, दिलीप आदे, शंकर बोरसरे, संदीप चुदरी यांनी केले. या तात्काळ व प्रभावी कारवाईबद्दल मुल येथील व्यावसायिक निरज सत्यनारायण सारडा (जे.डी. मार्ट) यांनी जिल्हा चंद्रपूर पोलीस प्रशासन व पोलीस स्टेशन मुल यांच्या कार्याचे कौतुक करत आभार मानले आहेत.
