तुमरकोठी येथे नव्या पोलीस स्टेशनची स्थापना अवघ्या २४ तासांत १०५० मनुष्यबळाच्या मदतीने उभारणी
📍वरिष्ठ अधिकाऱ्यांच्या उपस्थितीत उद्घाटन.
एस.के.24 तास
गडचिरोली : माओवाददृष्ट्या अतिसंवेदनशील आणि दुर्गम-अतिदुर्गम भाग म्हणून ओळखल्या जाणाऱ्या गडचिरोली जिल्ह्यातील उपविभाग हेडरी अंतर्गत तुमरकोठी येथे नवीन पोलीस स्टेशनची स्थापना करण्यात आली.गडचिरोली पोलीस दलाच्या वतीने शुक्रवार, १९ डिसेंबर २०२५ रोजी या पोलीस स्टेशनचे उद्घाटन मोठ्या सुरक्षा व्यवस्थेत पार पडले.
पोस्टे कोठीपासून अवघ्या ७ किमी आणि छत्तीसगड राज्य सीमेपासून फक्त २ किमी अंतरावर असलेल्या या अति-दुर्गम भागात पोलीस स्टेशन उभारल्याने स्थानिक नागरिकांच्या सुरक्षेला बळ मिळणार असून, त्यांना विकासाच्या मुख्य प्रवाहात आणण्यासाठी हे पोलीस स्टेशन मैलाचा दगड ठरेल, असे प्रतिपादन पोलीस अधीक्षक नीलोत्पल यांनी केले .
या पोलीस स्टेशनची उभारणी करण्यासाठी १००० सी–६० कमांडो, २१ बीडीडीएस पथके, नवनियुक्त पोलीस जवान, ५०० विशेष पोलीस अधिकारी तसेच खाजगी कंत्राटदारांचे मनुष्यबळ तैनात करण्यात आले होते.एकूण १०५० मनुष्यबळ, ४ जेसीबी, ७ ट्रेलर, २ पोकलेन व २५ ट्रक यांच्या सहाय्याने अवघ्या २४ तासांत पोलीस स्टेशनची उभारणी करण्यात आली.
नवीन पोलीस स्टेशनमध्ये वायफाय सुविधा, १२ पोर्टा कॅबिन, जनरेटर शेड, आरओ पिण्याच्या पाण्याचा प्लांट, मोबाईल टॉवर, स्वच्छतागृहे, मॅक वॉल, बी.पी. मोर्चा व ८ सँड मोर्चा उभारण्यात आले आहेत. सुरक्षेच्या दृष्टीने येथे गडचिरोली पोलीस दलाचे २ अधिकारी व ५२ अंमलदार, एसआरपीएफ ग्रुप-१२ (हिंगोली) चे २ प्लाटून, सीआरपीएफ १९१ बटालियनचे १ सहाय्यक कमांडंट व ७९ अधिकारी-अंमलदार तसेच विशेष अभियान पथकाचे ८ पथक (२०० कमांडो) तैनात करण्यात आले आहेत.या कार्यक्रमादरम्यान जनजागरण मेळावा आयोजित करण्यात आला.
यामध्ये स्थानिक नागरिकांना विविध उपयुक्त साहित्यांचे वाटप करण्यात आले. महिलांना साड्या, चप्पल; पुरुषांना घमेले, ब्लँकेट, स्वयंपाक भांड्यांचे संच; युवकांना कपडे, शैक्षणिक साहित्य तर लहान मुलांना क्रीडा साहित्य देण्यात आले.सन २०२३ पासून सुरक्षा पोकळी कमी करण्याच्या साखळीतील हे ९ वे नवीन पोलीस स्टेशन असून यापूर्वी पेनगुंडा, नेलगुंडा, कवंडे व फुलनार (गुंडूरवाही) येथे पोलीस मदत केंद्र व पोलीस स्टेशनची स्थापना करण्यात आली आहे.
वाढलेल्या सुरक्षेमुळे भविष्यात या भागात नवीन रस्ते बांधकाम व एस.टी. बस सेवा सुरू होण्याचा मार्ग मोकळा होणार आहे. नवीन पोलीस स्टेशनच्या स्थापनेमुळे स्थानिक नागरिकांनी समाधान व्यक्त करत पोलीस प्रशासनाचे आभार मानले.
या उद्घाटनप्रसंगी अपर पोलीस महासंचालक (विशेष कृती) डॉ. छेरिंग दोरजे, विशेष पोलीस महानिरीक्षक (नक्षलविरोधी अभियान) संदीप पाटील, पोलीस उप-महानिरीक्षक अंकित गोयल, सीआरपीएफचे उप-महानिरीक्षक अजय कुमार शर्मा, पोलीस अधीक्षक नीलोत्पल, सीआरपीएफ १९१ बटालियनचे कमांडंट सत्य प्रकाश यांच्यासह अनेक वरिष्ठ अधिकारी, पोलीस अंमलदार व ग्रामस्थ मोठ्या संख्येने उपस्थित होते.
